တံခါးကို ဟလိုက်သည်နှင့် ၀မ်းနည်းအားငယ်မှုတို့ အထင်းသားပေါ်လွင်နေသည့် မျက်ဝန်းအစုံကို တွေ့လိုက်ရသည်။ တံခါးတွင် ချိတ်ထားသော သံကြိုးလေးကို သူမ ဖြုတ်လိုက်သည်။
“ဒါက ဘယ်လိုဖြစ်တာလဲ”
“ဘယ်လိုဖြစ်ရမလဲ။ အဖေတို့က အိမ်ပြောင်းတော့မှာလေ..။ သူတို့ပြောင်းမဲ့ကွန်ဒိုမှာ ခွေးမွေးလို့မရဘူးတဲ့”
မိုးသီးက ဇော့်ခြေထောက်နှစ်ချောင်းကြားမှ နေ၍သူမကို စိုက်ကြည့်နေသည်။ သူကလည်း အခြေအနေကို နားလည်သဘောပေါက်နေသည့်အလားပင်။
တောင်းပန်တိုးလျှိုးနေသော မျက်ဝန်းအစုံကို မျက်နှာလွှဲလိုက်ပြီး ဇော့်ကို သူပြောလိုက်သည်။
“နိုး..နိုး၊ ဇော်..မရဘူး၊ ဒါတော့ ဘယ်လိုမှ မဖြစ်နိုင်ဘူး”
သူမ၏ ငြင်းဆိုမှုကို ကြားလိုက်ရသော်လည်း ဇော့်မျက်နှာက သိသိသာပြောင်းလဲမသွား။ ဇော့်ပုံစံက အမှတ်စစ်သည့်ဆရာမများထံ အမှတ်ဘယ်နှမှတ်အတွက် ငွေဘယ်လောက်ဆိုတာမျိုး ပေးခဲ့ပြီးဖြစ်၍ အောင်စာရင်းတကယ်ထွက်သည့်အခါ ရင်ခုန်မှုမရှိသည့် ကျောင်းသားတစ်ယောက် အသွင်ကို ဆောင်နေသည်။
မိုးသီး၏ ကျောကို သူမသပ်ပေးနေစဉ် ဇော်က မီးဖိုဆောင်ဘက်သို့ ထွက်သွားသည်။ ပြန်ထွက်လာတော့ ကော်ဖီနှစ်ခွက်ယူလာသည်။ သူမလည်း ဆံပင်များခြောက်အောင် တဘက်ဖြင့် သေချာသုတ်နေလိုက်သည်။ “စူးစူးကိုကော ဘယ်လိုလုပ်ထားသလဲ”။ စူးစူးမှာ ဇော့်တို့မွေးထားသည် နောက်ထပ်ခွေးတစ်ကောင် ဖြစ်သည်။ စူးစူးက စပင်နီယယ်ဖြစ်ပြီး မိုးသီးက အယ်ဇေးရှင်းဖြစ်သည်။
“စူးစူးက ယူမယ့်လူရှိတယ်”
“အင်း…မိုးသီးကျတော့ ဘယ်လိုဖြစ်လို့လဲ”
“အသိထဲမှာက ခြံရှိတဲ့လူက သိပ်မရှိဘူးလေ။ ကိုယ်တော့ ဘယ်လိုလုပ်ရမလဲမသိတော့ဘူး”
သူမ တိတ်ဆိတ်နေသည်။ ဒီစကားကို ဇော်ပြောလိုက်သည်က သူမထံမှ အကြံညဏ်လိုချင်၍ မဟုတ်ဆိုသည်ကို သူမသိပြီးသား။ ဒီလိုပဲ အကြံအိုက်စရာ ကြုံလျှင် ဇော် သူမဆီ ပြေးလာစမြဲ။ ကိုယ်တော့ ဘယ်လိုလုပ်ရမလဲ မသိတော့ဘူးဟု ပြောစမြဲ…။ နောက်တော့ သူ့ဖာသာသူ ဆုံးဖြတ်ချက်တစ်ခုချစမြဲ။ အစပိုင်းကတော့ သူမက ၀င်ပြီး အကြံပေးတာတွေ ဘာတွေလုပ်သေးသည်။ ရွေးစရာလမ်းနှစ်ခုရှိလျှင် သူမပြောသည်ကို မရွေးဘဲ သူထင်ရာကိုပဲ ရွေးတတ်တာမို့ နောက်တော့ သူမ ဘာမှ ၀င်မစွက်တော့။
ဇော်နှင့် သူမ ပတ်သက်ခဲ့သည်မှာ ကြာပြီ။ ချစ်သူတွေ ဖြစ်ခဲ့ကြသည်မှာလည်း ကြာပြီဖြစ်သည်။
စိတ်ကူးတွေက အတိတ်ဆီသို့ ပြန်ပြေးသွားသည်။ ၂၀၀၇ခုနှစ်က ဒီနိုင်ငံသို့ သူမ ပထမဆုံးရောက်လာပြီး တစ်ပတ်မပြည့်ခင် ဇော်နှင့် စတင်ဆုံဆည်းခဲ့သည်။ အဲဒီနေ့က အသိတစ်ယောက်က အပြင်မထွက်ဖို့ မေးပို့ထားပေမယ့် ဂျာနယ်လစ်တစ်ယောက်အဖြစ် အသက်မွေးခဲ့ဘူးသည့် သူမရဲ့ ဗီဇက တိုက်တွန်းသဖြင့် သူမအပြင်သို့ထွက်လာခဲ့သည်။ ကမ္ဘာအေးဘုရားလမ်းတလျှောက် ဖြတ်သန်းလာပြီး မြို့ထဲသို့ ရောက်လာသည်အထိ ဘာတစ်ခုမျှ ထူးထူးခြားခြားမတွေ့ရ။ ဆူးလေးဘုရားလမ်းတွင်တွေ့ရသည့် ကော်ဖီဆိုင်တစ်ဆိုင်တွင် ၀င်ပြီး မနက်စာစားတော့ နံနက် ကိုးနာရီကျော်ကျော်ခန့်ရှိမည်။ နာရီဝက်ခန့်အကြာတွင် လမ်းမတလျှောက် မြင်ကွင်းမှာ ပြောင်းလဲလာသည်။ ဂျာနယ်လစ်တစ်ယောက်အဖြစ် ငါးနှစ်ခန့်လုပ်ကိုင်ခဲ့သည့် အလေ့အကျင့်က သူမကို ဆိုင်ပြင်သို့ တွန်းပို့လိုက်သည်။ ………………………………………………………………………………………………………………………………………………………..
………………………………………………………………………………………………………………………………………………………
………………………………………………………………………………………………………………………………………………………….
……………………………………………………………………………………………………………………………………………………..
ပြေးလွှားနေသော လူအုပ်မှာ သူမနှင့် ခပ်လှမ်းလှမ်းတွင် ရှိနေသော်လည်း မကြာမီ သူမရှိရာသို့ ရောက်လာတော့မည်ဖြစ်သည်။ အနောက်ဘက်ရှိ ဆိုင်ခန်းတစ်ခုခုထဲသို့ ခွင့်တောင်းဝင်ရောက်ရန် ကြည့်လိုက်သော်လည်း တံခါးများ ပိတ်ထားသည်ကို တွေ့ရသည်။ ခပ်လှမ်းလှမ်းရှိ သူမစောစောက ထိုင်ခဲ့သော ကော်ဖီဆိုင်မှာ ဘယ်အချိန်က အလူမီနီယံလိပ်တံခါးကို ချလိုက်မှန်းပင်မသိလိုက်ရ။
ထိုစဉ်မှာပင် သူမကျောဘက်ဆီမှ ဟေး..ဒီကို လာခဲ့ဆိုသော ပီသသည့် အင်္ဂလိပ်စကားသံကို ကြားလိုက်ရသည်။ ဘေးဘီကို လည့်ကြည့်တော့ သူမကို ကြည့်နေသူ ဘယ်သူမှမတွေ့ရ။ ဟေး..အပေါ်မှာ..ဒီမှာ။ အပေါ်ကို မော့ကြည့်လိုက်တော့ ပထမထပ်အခန်းတစ်ခုမှ လူငယ်တစ်ယောက်က သူမကို လက်ယပ်ကို ခေါ်နေသည်။ သူမလည်း ကမန်းကတန်းအပေါ်သို့ ပြေးတက်ခဲ့သည်။ သူမထက် ငါးနှစ်ခန့်ငယ်ပုံရသော ထိုလူငယ်က သူ့ကိုယ်သူ ဇော်ဟု မိတ်ဆက်ရင်း လိပ်စာကဒ်ပြားတစ်ခု ကမ်းပေးသည်။
