Feeds:
Posts
Comments

Archive for the ‘Prose’ Category

 

ကျွန်လေတကျွန်ပေါ်မှာ သူကျောင်တက်နေခဲ့တယ် ကျွန်ကနေ အနီဆုံမြို့ကို ဇက်စီပီ သွာရတယ် ဇက်ဆွာ ၀မ်ပြာပြာ သင်္ဘောတမျိုပဲ ဇက်စီတာ တနာရီလောက်ကြာတတ်တယ် တခါတလေ နှင်ကျတက် မနက်တွေဆို မြစ်ပြင်က ပင်လယ်လိုပဲ ကမ်မမြင်လမ်မမြင် ဇက်ကပ်တဲ့နေရာက အဲဒီမြို့ရဲ့ဈေဖဲ သူတော့ ဇက်ပေါ်က တက်တာနက် ဈေထဲမယ် ဆီချက်ခေါက်ဆွဲ စာလေ့ရှိတယ် အဲ့ဆိုင်ကလို သခွာသီပါပါလေတွေပေါ် ငရုတ်ဆီဆမ်ပေတာမျို သူတို့ကျွန်ဘက်မယ် မရှိပု ဈေထဲကထွက်ပီ လမ်မကြီကို ဖြတ်လိုက်ရင် နောက်ဈေတစ်ခုကို သွာတက်လမ်ကြာကလေ ရှိတယ် အဲလမ်ကြာဟာ သူမြို့တက်ရခြင်ရဲ့ မစ်ရှင်ပဲ ဗစ်ရှင်ပဲ အော်ဘဂျက်တစ်ဖဲ အဲလမ်ကြာလေမှာ ကက်ဆက်ခွေ အဟောင်လေတွေ ရတတ်တယ် ဖူမောက်က ထုတ်တဲ့ သနပ်ခါနံသင်နေတဲ့ ကာဗာနက် ဘိုဘိုဟန်ခွေ မပေါ်ခင်ခေတ်က ခွေတေပေါ့ မာကျူရီညတို့ အတ္တပုံဆောင်ခဲမျာတို့ နောက်ပီ မောင်ချဓာတို့ ဘာတို့ အဲလို တိုလီမုတ်စမျိုတွေ နောက်ပီ ရတနာဝင်ထိန်ရဲ့ စာအုပ်ပါပါလေတွေ အဲဒီလမ်ကြာလေကပဲ ရေမွှေနံရတဲ့ စာအိတ်ပန်ရောင်လေ ၀ယ်ခက်တယ် စင်ကြယ်ဖိနပ်စီတက် ကောင်မလေအတွက်ပေါ့ ကျွန်ပေါ်မှာတော့ နေ့ရက်တွေဟာ နှစ်တစ်နှစ်ရဲ့ စတုတ္ထလကို ဗဟိုပြုပီ တည်ရှိနေကြတာပဲ လေထောင့်စပ်စပ် သစ်သာကိုယ်ထည်နဲ့ ဘတ်စ်ကာကြီတွေဟာ နေ့တဓူဝ ပြေဆွဲနေကျ လမ်တွေကို စွန့်ခွာပြီ တလလုံလုံ တရက်ဆို တရွာထဲကိုပဲ ဦတည်ဆိုက်ကပ်နေကြတော့တယ် သူလဲထိကရုန်ပင်တွေ ခြေမနဲ့ကလော်ကြည့်နေရာက ကြယ်သုံပွင့်တံဆိပ်ပါတက် ဗွီအိပ်အက်စ်ခွေတွေ ရှာပီငှာတတ်လာတယ် အကောင်ဆုံအခန်တွေကို ကပ်ကြေနဲ့ညှပ်ယူပီ အိမ်က အဒေါ်ရဲ့ ဖင်မလီအယ်လ်ဘမ်ခွေထဲမှာ ပြန်ဆက်ထားလက်တယ် နောက်တော့ သာထွေရဲ့ အမည်ပေမထာခွေ ထွက်လာတယ် သူ့သူငယ်ချင်တွေအကြာ ပလာတာကို ငရုတ်ဆီနဲ့ တို့စာတာ ခေတ်စာလိုက်သေတယ် စင်ကြယ်ဖိနပ်စီတက်ကောင်မလေက သူ့စာအိတ်လေ ပြန်ပေလာတယ် အတန်ပိုင်ဆရာမကတဆင့်ပေါ့  သစ်သာစာပွဲပေါ်ကို ဆောင့်ချလက်တဲ့ တကျပ်ဖို ငါလိပ် သုခိတာတွေက အချိန်တွေကို အခုလိုမဟုတ်ဖဲ ပေါ့ပါစေခက်တယ် စစ်ပြန်ကြီးဆိုင်မယ် နေလင်အောင် ရဲမန်အောင် အသစ်မထွက်တဲ့ အပတ်တွေမှာ ဇစ်မြစ်တို့ တိုပိုင်တဲ့မြေတို့ဆိုတက် စာအုပ်ကို သွာကိုင်မိတယ် နောက်တော့ ကလေဘ၀က ရထာပေါ်မယ် ဖတ်ခက်ဖူတက် ရှုမ၀ စန်ဒါတို့နက် မတူတော့တက် မက်ဂဇင်တွေ ပီတော့ ကဗျာဆိုတာနည်နည် ငွေယံဦ မောင်အောင်ပွင့် စသည် တပုဒ်ချင် ပြောကြေဆွင်တော့ ဇာလာ?ရဲ့ ပွဲတော်ဝေေ၀ဖဲ အက်လိုနက် (ဖဘမယ်စာရေတာ ဒီလောက်ဆို တရာလွန်ရှည်နေပီ) တရက်တော့ ကျောင်က ဖုန်ကြီဖူထွက်ကြတယ် ဖရာဖူမုတ်ပုနော် လေထောင့်စပ်စပ် သစ်သာကိုယ်ထည်ဘတ်စ်ကာကြီရောက်လာတယ် ကောင်မလေတွေက အောက်ထပ် ကောင်လေတွေက ခေါင်မိုပေါ် တက်ကြတယ် ဖြစ်ချင်တော့ (မဖြစ်ချင်တော့လို့ ပြောလဲရတယ်) သူခေါင်မိုပေါ်လှမ်အတက် စင်ကြယ်ဖိနပ်စီတက် ကောင်မလေရဲ့ ကျောကို ကန်လိုက်မိတယ် ဖုန်ကြီကျောင်က လာသမျှလူကို ထမင်ကျွေတယ် အဲဒီနေ့ကတော့ အဆင်မပြေမှုတွေ ရွာသွန်မြဲထက် ကျော်လွန်တက်နေ့ပဲ ထမင်ပန်ကန်ထဲမယ် လူလက်သည်တစ်စုံ ပါလာတယ်

 

Advertisements

Read Full Post »

 

ဒုတိယမြောက် ဘီယာခွက် မကုန်မီ အဘွားကြီးတစ်ယောက် မယောင်မလည်နှင့် သူ့နား ကပ်လာသည်။ သား ဗေဒင်မေးမလားတဲ့။ လက္ခဏာရောကြည့်လားအဘွားလို့ သူ ပြန်မေးလိုက်သည်။ ဘာမှတော့မဟုတ်။ ဗေဒင်ဆို ကိုယ်က ဒေတာတွေ ထပ်ပေးနေရဦးမည်။ လက္ခဏာကတော့ လက်ဝါးကို ဖြန့်ပေးလိုက်ရုံပဲ မဟုတ်လား။

အဘွားကြီးက ခေါင်းငြိမ့်ပြရင်း သူ့ရှေ့က ခုံမှာ ၀င်ထိုင်သည်။ လက်ထဲက ပုစွန်ကြော်တပိုင်းကို လက်စသတ်လိုက်ပြီး လက်ဖ၀ါးကို အဘွားကြီးရှေ့အသာထိုးပေးလိုက်သည်။ အဘွားကြီးက သူ့လက်ဖ၀ါးကို ဆွဲလှန်လိုက်သည်။ သူကြောင်အမ်းအမ်း ဖြစ်သွားသည်။ အဘွားကြီးက သူ့လက်ဖမိုးပေါ်က သွေးကြောတွေကို ခပ်ဖွဖွ လိုက်စမ်းနေသည်။ အဘွားလက္ခဏာဆိုတာ လက်ဖ၀ါးကို ကြည့်ရတာမဟုတ်လားလို့ မေးမည် ပြုပြီးမှ သူအသာငြိမ်နေလိုက်သည်။

ခနနေတော့ အဘွားကြီးဆီက အသံထွက်လာသည်။ သားက စိတ်သိပ်မမှန်ဘူးနော်တဲ့။ အားနေတဲ့လက်တစ်ဖက်က ခါးမှာထိုးထားသည့် သေနတ်ကို တင်းတင်း ဆုပ်ကိုင်မိသွားသည်။ ကျွန်တော့်ကို ဘာဖြစ်လို့ စိတ်မမှန်ဘူးလို့ ပြောတာလဲဟု လေသံမာမာဖြင့် သူပြောလိုက်သည်။ အဘွားကြီးက အတက်အကျ မရှိသော လေသံဖြင့် ပြန်ပြောသည်။ သားရဲ့ တူလေး ရေနစ်နေတာကို မကယ်ဘဲနဲ့ သားဒီတိုင်းကြည့်နေခဲ့တယ်လေ။ အဲဒါကိုက သားစိတ်မမှန်လို့ပဲပေါ့။

သူ ငြိမ်ကျသွားသည်။ တကယ်တော့ အဲဒါ ကျွန်တော့်တူမဟုတ်ဘူး။ ကျွန်တော့်သားဗျ လို့ သူအော်ဟစ်ပစ်လိုက်ချင်သည်။ ဒါမှမဟုတ် ဘောင်းဘီအိတ်ထဲက သေနတ်ကို ထုတ်၍ အဘွားကြီးရဲ့ မျက်လုံးနှစ်လုံးကြားထဲကို ပစ်ထဲ့လိုက်ချင်သည်။ တစ်ခုမှ သူမလုပ်ဖြစ်။

အဘွားကြီး ဆက်ပြောနေတာတွေ သူမကြား တချက် ကြားတချက်။ တကယ်တော အဘွားကြီးပြောတဲ့ သူ့တူဆိုတာ သူနဲ့ သူ့အစ်မနဲ့ အိပ်ဖြစ်ရာက ရလာတဲ့သားဖြစ်သည်။ ပတ်ဝန်းကျင်ကတော့ သူ့အစ်မနဲ့ တခြား အမည်မဖော်လိုသူတစ်ယောက် ရပြီး မွေးလာတာလို့ မြင်ကြသည်။ ကလေး မီးဖွားရန် သူ့အစ်မဆေးရုံတက်နေစဉ် သူတို့နေထိုင်သည့် တဲတန်းလေး ဘူဒိုဇာဖြင့် အထိုးခံရသည်။ သူတို့ ပြန်လာတော့ သူနေထိုင်ခဲ့ရာ ရပ်ကွက်တစ်ခုလုံး တနည်းအားဖြင့် ပတ်ဝန်းကျင်တစ်ခုလုံး ဘာမှမရှိတော့။

သူ့အစ်မ ဆေးရုံကဆင်းလာပြီး မောင်နှမနှစ်ယောက်ရယ် ကလေးရယ် မြစ်ကမ်းဘေးမှာ တဲထိုးပြီး သွားနေကြသည်။ တစ်နေ့ သူ့အမ အကြော် ထွက်ရောင်းစဉ် ကလေးက သောင်ပြင်မှာ တွားသွားရင်း နောက်ဆုံး မြစ်ထဲ ပြုတ်ကျသွားသည်။ ဆယ်စုနှစ်ပေါင်းများစွာ ကြာခဲ့ပြီဖြစ်သော်လည်း ထိုနေ့က သူ့ရှေ့မှာ ဖြစ်ပျက်နေသည်တို့ကို ယခုထိ သူအသေးစိတ် မှတ်မိနေသည်။ အဖြစ်အပျက်တွေထဲမှာ သူဝင်မစွက်ဖက်ပဲ နေခဲ့တာကိုရောပေါ့။

သူသတိ ပြန်ဝင်လာတော့ အဘွားကြီးက ထိုင်ရာကနေ ထနေပြီ။ သူ ပိုက်ဆံအိတ်ကို ဖွင့်မလို့လုပ်တုံး အဘွားကြီးက လိပ်စာကတ်တစ်ခု သူ့ရှေ့ကို ချပေးရင်း ပြောသည်။ သူ့အပေါ် အခေါ်အဝေါ်လည်း ပြောင်းသွားသည်။ ဗိုလ်ချုပ် နောင် အကူအညီလိုရင်လည်း အဘွားကိုပြောနော်။

အဘွားကြီး ကျောခိုင်းသွားပြီး အတော်ကြာမှ လိပ်စာကတ်ကို သူကြည့်လိုက်တော့ ကတ်ပေါ်မှာ ဘာနာမည်မှ ရေးမထား။ ပန်းချီတင်ထွဏ်း၏ လက်ရေးမျိုးဖြင့် ရေးထားသည့် အတိုင်ပင်ခံဟူသည့်စာလုံး။ ထို့နောက် onyx ဖောင့်ဖြင့် ရေးထားသည့်အီးမေးလ်လိပ်စာ တစ်ခု။

Read Full Post »

 

ချင်းပြည်ရောက်တုံး ကဖေးကန်ပက်လက်ဆိုတဲ့ ကော်ဖီဆိုင်လေးမယ် ထိုင်မိတယ်

အဲဒီမယ် ဒေသခံတွေနဲ့ စကားရော ဖောရောလုပ်ရင်း အောင်န်ထာန်ဆိုတဲ့ ချင်းတစ်ယောက်က သူ့ဘကြီးအကြောင်း ပြောတာကြားခဲ့ရတယ် သူ့ဘကြီးနာမည်က လန်ထာန်တဲ့ လန်ထာန်က ရန်ကုန်တက္ကသိုလ် တစ်နှစ်လောက် သွားတက်ပြီး ပြန်လာထဲက ငါးမျှားရတာ စွန်းဝါသနာပါလာသတဲ့ ပေ ရှစ်ထောင် တစ်သောင်းမြင့်တဲ့ အဲ့လိုနေရာမယ် ငါးမျှားဖို့ဆိုတာ လွယ်တဲ့ကိစ္စ မဟုတ်ပုလေ

ဒါပေမယ့် အဲဒီအချိန်လောက်တုံးက ခေါနုစုမ်တောင်ထိပ်မဲ ရေကန်ကြီးရှိသတဲ့ လန်ထာန်လဲ အဲ့တောင်ပေါ်ကန်မယ် အမြဲသွားသွားပြီး လှေလေး တစ်စင်းနဲ့ ငါးမျှားမျှားနေဆိုပဲ တခါတလေ ညဘက်လဲ တောင်အောက်ပြန်မဆင်းဘဲ နေတယ် လသာသာ တောင်ထိပ်မယ် ငါးမျှားရတာကတော့ စွန်းဖီးကောင်းမှာ သေချာတယ်

တခါသားတော့ လန်ထာန် အဲလို တျောက်ထဲ ညဘက်ငါးမျှားနေတုံး သူ့လှေပေါက်ပါလေရော သေချာကြည့်လိုက်တော့ လှေကပေါက်တာတောင်မုတ်ပု ကွဲတာတဲ့ လန်ထာန်လဲ လှေကွဲကို ထားခဲ့ပြီး ကမ်းထိကူးဖို့ လုပ်ပေမဲ့ ကမ်းက အတော်ဝေးနေတာနဲ့ အနားမယ်တွေ့တဲ့ ရေမျောသစ်လုံးတစ်လုံးကို မှေးပြီးနေရတယ် သူ့ကြံခိုင်မှုနဲ့ဆို သစ်လုံးကို မှေးပြီး ကမ်းထိ ခတ်သွားမယ်ဆို ဖြစ်နိုင်လောက်တယ်

ဒါပေမယ့် အဲဒါ ပေတစ်သောင်းကျော်အမြင့်က ရေကန်ထဲမှာဆိုတော့ ရေက မခံမရပ်နိုင်လောက်အောင် အေးနေတယ် လန်ထာန်အနေနဲ့ တကိုယ်လုံး သစ်လုံးပေါ် ရောက်ပြီး ရေနဲ့ တတ်နိုင်သမျှ မထိအောင် ငြိမ်ငြိမ်လေး နေနေရတယ် ရေနဲ့ထိလိုက်တဲ့အပိုင်းက တချက်တည်း ထုံတက် ကျဉ်တက်လာတော့တယ် ညနက်လာတော့ အိပ်ငိုက်ပြီး တုံးပေါ်က ပြုတ်မကျအောင်လည်း အတော်သတိထားရသေးတယ်

အဲဒီအချိန်တုံးက ခေါနုစုမ် တောင်ထိပ်ပေါ်လည်း တစ်ပတ်နေလို့မှ လူတစ်ယောက် မရောက်တတ်ကြတော့ ကယ်မယ့်လူတွေ လှေတွေ မျှော်ဖို့ကလည်း မဖြစ်နိုင်ပုလေ ရေနဲ့ မထိအောင် ဂရုစိုက်တဲ့ကြားက ရေစိုထားတဲ့အ၀တ်တွေ တိုက်နေတဲ့လေတွေကြောင့် ငါတော့ မနက် လာကယ်မယ့်လူကိုထားဦး ဒီညတောင် ခံနိုင်ပါ့မလားဆိုပြီး လန်ထာန်ရဲ့စိတ်ထဲ ဖြစ်မိသတဲ့

အဲလိုနေရင်း ခဏနေတော့ ကောင်းကင်မယ် ဖျတ်ဖျတ် ဖျတ်ဖျတ်နဲ့ အလင်းရောင် တစ်ခုကို မြင်လာရတယ် အေးကလည်းအေး လူကလည်း စိတ်ကယောက်ကယက်နဲ့ ငါ့များ ကယ်ရအောင် ကောင်းကင်က အဇုန်းနတ်သမီးများ ဆင်းလာပြီးလာ ထင်မိတယ် ဒါပေမယ့် အဲဒီအလင်းရောင်လေးက တဖြည်းဖြည်းကြီးလာလိုက်တာ နတ်သမီးမဟုတ်မှန်း သိလာရတယ် ပိုကြီးကြီးလာ နီးနီးလာတော့ မီးလောင်နေတဲ့လေယာဉ်တစ်စီးမှန်း သိလိုက်ရတယ် လေယာဉ်က လန်ထာန်ဆီ တည့်တည့် စိုက်ဆင်းလာတာဆိုတော့ ရေကန်ထဲမှာ ရေနစ်လို့မသေဘဲ လေယာဉ်တိုက်လို့ သေရချည်ဆိုပြီး မျက်စိကို စုံမှိတ်ထားလိုက်သတဲ့

နွားနောက် တစ်မိတ်လိုက်လောက် ကြာသွားတော့ နားထဲမယ် အုန်းခနဲ အသံကြီးကြားလိုက်ရပြီး ရေလှိုင်းကြီးကလည်း လာရိုက်တာနဲ့ သစ်တုံးကို မြဲမြဲ ဖက်ထားလိုက်ရတယ် မျက်စိကို ပြန်ဖွင့်ကြည့်လိုက်တော့ ရေကန်ထဲ နစ်စပြုနေတဲ့ လေယာဉ်ကြီးကို ခပ်လှမ်းလှမ်းမှာ မြင်လိုက်ရတယ် နစ်စပြုနေတယ်ဆိုတာ ထက်ပိုင်းကျိုးသွားတဲ့ လေယာဉ်ရဲ့ နောက်တပိုင်းကို ပြောတာ ရှေ့တပိုင်းကိုဆို မြင်တာင် မမြင်ရတော့ပုတဲ့ လန်ထာန်လည်း ရေရဲ့ အအေးဓာတ်ကိုတောင် မေ့သွားပြီး လေယာဉ်ကြီးဆီကို ဦးတည်ပြီး အတင်း ခတ်သွားလိုက်တယ်

ဒါပေမယ့် သူအဲဒီနားရောက်သွားတဲ့အချိန်မှာ ရေပြင်ပေါ် တက်နေတဲ့ ပလုံစီတချို့ကလွဲလို့ လေယာဉ်ပျက်ရဲ့ အစအန လေယာဉ်ပေါ်ပါလာတဲ့လူ ပစ္စည်းအစအန ဘာတစ်ခုမှ မတွေ့ရတော့ဘူး လန်ထာန်လည်း သစ်တုံးပေါ်မယ် အသာလေး ငြိမ်နေမိတယ် လူကလည်း ရှိစုမဲ့စုအားကို အတင်းသုံးပြီး ခတ်လိုက်မိတော့ သတိလွတ်ချင်ချင် ဖြစ်နေပြီ အဲဒီမှာ ကောင်းကင်မယ် နောက်ထပ် အလင်းရောင်တွေ အများကြီး တွေ့လိုက်ရသလို ထင်လိုက်မိတယ်

တကယ်က လန်ထာန်ထပ်တွေ့တဲ့ အလင်းရောင်တွေဆိုတာက ခုနက မြှပ်သွားတဲ့ လေယာဉ်ကြီးအတွက် လိုက်လာတဲ့ ကယ်ဆယ်ရေး ရဟတ်ယာဉ်တွေပဲ ရဟတ်ယာဉ်သုံးလေးစီးနဲ့ တတောင်လုံးကို ပတ်ပြီးဝိုင်းရှာကြပေမယ့် လေယာဉ်ပေါ်က လူတစ်ယောက် ပစ္စည်းတစ်ခုတလေတောင် မတွေ့ကြရဘူး သူတို့တွေ့ရတာက ရေကန်ထဲက သစ်တုံးပေါ်မယ် သတိလစ်နေတဲ့ လန်ထာန်ပဲ ပထမတော့ သူတို့လဲ လန်ထာန်ကို လေယာဉ်ပေါ်က ခရီးသည်ပဲထင်တယ် လန်ထာန်က မဟုတ်ပါဘူးလို့ အတင်းပြောတာတောင် လက်မခံကြဘူး

နောက်ဆုံး လန်ထာန်ကို ကန်ပက်လက်ကို ပြန်သယ်လာပြီး တာဝန်ရှိသူတွေနဲ့ စစ်ဆေးပြီးမှ လေယာဉ်မြုပ်ခါနီးတုံးက ကျနော် ကန်ထဲမှာ ငါးမျှားနေတာပါဆိုတဲ့ လန်ထာန်ရဲ့ ဇာတ်လမ်းကို ယုံသွားကြတော့တယ် တခြားအနီးပတ်ဝန်းကျင်တ၀ိုက်လည်း လေယာဉ်ပျက် အစအန တခုတလေ မတွေ့ရတော့ လေယာဉ်ကြီးဟာ ရေကန်ထဲပဲ မြှပ်သွားတယ်ဆိုတဲ့ လန်ထာန်ရဲ့ ထွက်ချက်ကိုလည်း အတည်ယူလိုက်ကြရတယ်

အောင်န်ထာန်ကတော့ သူ့ဘကြီးကိုယ်တိုင် ပြောပြတာ နားထောင်ရရင် ဒီဇာတ်လမ်းက ပိုကောင်းတယ်လို့ ပြောတယ် သူ့ဘကြီးက ခုတော့ ကန်ပက်လက်မယ် မနေတော့ဘူး လေယာဉ်ပျက်တာနဲ့ ကြုံပြီး မကြာခင် အိမ်ထောင်ကျပြီး မင်းတပ်ကနေ မတူပီသွားတဲ့လမ်းပေါ်က ရွာလေးတရွာကို ပြောင်းသွားပြီ လန်ထာန်ဟာ ခုထိ အဲဒီရွာမယ် သက်ရှိထင်ရှားရှိသေးတာမို့ တွေ့ချင်ရင် သွားတွေ့ပြီး မေးလို့ရတယ်လို့တောင် ကျော့်ကို ပြောလိုက်သေးတယ်

 

-မဆ

Read Full Post »

၂၀၁၆-၁၇ တုန်းက ၀တ္ထုတစ်ပုဒ်ကို အပြီးသတ်ဖို့ သူကြိုးစားနေခဲ့သည်။ ဒါမှမဟုတ် ၀တ္ထုတစ်ပုဒ်ကို အကြိမ်ကြိမ် ပြန်ရေးနေခဲ့သည်။ ၂၀၁၆-၁၇ ဆိုတာ ပြက္ခဒိန်နှစ်တစ်နှစ်မဟုတ်ဘဲ ပညာသင်နှစ်လိုမျိုး ဘဏ္ဍာရေးနှစ်လိုမျိုး ပြက္ခဒိန်နှစ် နှစ်ခုပါဝင်သည့် ကာလအပိုင်းအခြားတစ်ခုပေါ့။

ဇာတ်လမ်းအစကတော့ အရက်ဝိုင်းမှာ ဟိုရောက်ဒီရောက် ပြောကြရင်း ရာဇ၀တ်မှုထူထပ်များပြားလာခြင်းဆိုတဲ့အကြောင်းဆီရောက်သွားကြသည်။ သူငယ်ချင်းတွေ တစ်ယောက်တစ်ပေါက် အဲဒီအကြောင်း ပြောကြရကနေ ကလေးတွေ လူကို ဓားနဲ့ထိုးဖို့ ၀က်နဲ့အရင်အထိုးသင်ပေးတဲ့အကြောင်းဆီ ရောက်သွားသည်။ အဲဒီအကြောင်းကို ၀တ္ထုတစ်ပုဒ်ဖြစ်အောင်ရေးမည်ဟု သူပြောခဲ့ပြီး ရေးလည်းရေးခဲ့သည်။

“မြို့ကလေးကလူတွေက ရေသာဘက်က လူတွေနဲ့ ဘယ်တော့မှ ပြဿနာမဖြစ်ချင်ကြ။ ဒီလူတွေက သူတို့ နာကြည်းပြီဆိုရင် အဲဒီလူနဲ့ နောက်ဘယ်တော့မှ မျက်နှာချင်း ပြန်မဆိုင်မိအောင် လုပ်လေ့ရှိသည်။ အဲဒီလိုလုပ်သည်ဆိုရာတွင်လည်း လူကြီးတွေ ကိုယ်တိုင် ဘယ်တော့မှ မလုပ်။ အသက်မပြည့်သေးသည့် ကလေး တစ်ယောက်ကို လုပ်စရာရှိသည်များ သင်ပေးပြီး လုပ်ခိုင်းလိုက်သည်။ နောက်ဆုံး မိသွားလျှင်လည်း အသက်မပြည့်သေးသည့်အတွက် သီးသန့်သတ်မှတ် ထားသော စခန်း ဒါမှမဟုတ် ကျောင်းလို နေရာမျိုးမှာ နှစ်အနည်းငယ်နေပြီး ပြန်လွတ်လာမြဲဖြစ်သည်။ နောက်ထပ် နာကြည်းစရာကိစ္စ တစ်ခုပေါ်လာလျှင်လည်း နောက်ကလေးတစ်ယောက်ကို လေ့ကျင့်ပေးပြီး လုပ်စရာရှိသည်ကို လုပ်ခိုင်းမြဲဖြစ်သည်”

ဝတ္ထုထဲမှာ သူအဲဒီလို ထည့်ရေးထားခဲ့သည်။ ၀တ္ထုကို ၂၀၁၆ မကုန်ခင် အပြီးသတ်နိုင်အောင် ကြိုးစားသည်။ ၀တ္ထုထဲမှာ ထည့်သွင်းမည့် အပိုင်းအစတစ်ချို့ကို သူ၏ ဖေ့စ်ဘွတ်အကောင့်တစ်ခုတွင် စတေးတပ်အဖြစ်ပင် တင်လိုက်သေးသည်။ ၀တ္ထု၏ အဓိက ဇာတ်ကောင်ဓားထိုးခံရပြီး မသေခင်နာရီပိုင်းအတွင်း အာရုံတွင် ပေါ်လာသည့် ပုံရိပ်များအဖြစ် အဆိုပါ အစိတ်ပိုင်းများကို တည်ဆောက်ထားခြင်းဖြစ်သည်။ လူတွေဟာ မသေခင် ကိုယ့်ဘ၀ကိုယ် ရုပ်ရှင်ပြကွက်တွေပြန်ပြသလို မြင်ရတယ်ဆိုတာမျိုးဟု ပြောရမည်။

တကယ်တော့ အဲဒီတုံးက ရောဘတ်တိုဘိုလာနိုးရဲ့ ၂၆၆၆ ကို ဖတ်နေတုံး အဲဒီဆရာသမားရဲ့ လုပ်ကွက်တွေကို ဂါပြီး လိုက်လုပ်ကြည့်တာဖြစ်သည်။ အရက်ဆိုင်မှာ ဘေးဝိုင်းကပြောသမျှ ကြားနေရတာ၊ စားသောက်ဆိုင်မှာ တီဗွီက ပြနေတာတွေကိုလည်း ၀တ္ထုထဲ ထည့်ရေးတာမျိုးပေါ့။

၂၀၁၆ ကုန်ခါနီး သူချင်းတောင်သို့ ရောက်သွားသည်။ ၀ိတိုရိယတောင်ကို တက်လိုက်သေးသည်။ စာအုပ်တွေထဲမှာ ဖတ်ရသလို ဘာကျေးငှက်ပန်းမန်မှ သေသေချာချာ မတွေ့ရတော့။ တောင်ဇလပ်ပန်းတောင် ဟိုနားဒီနား နည်းနည်းပါးပါးပဲ တွေ့ရတော့သည်။ ချင်းတောင်မှာ ရှိနေစဉ် ၀တ္ထုကို နည်းနည်းပြန်ဖတ် နည်းနည်းပြန်ရေးလုပ်နေသည်။ နှစ်သစ်ကူးကို တောင်ပေါ်က ဟိုတယ်တစ်လုံးမှာ မီးပုံပွဲနှင့် ဖြတ်သန်းလိုက်သည်။ ၀တ္ထုကတော့ မပြီး။

ဇန်န၀ါရီလထဲရောက်တော့ ၀တ္ထုဘက် ပိုလို့မလှည့်ဖြစ်။

ဖေဖော်ဝါရီမှာလည်း ထိုနည်းနှင်နှင်။

မတ်လထဲမှာ အလုပ်မှာ အဆင်မပြေသည်နှင့် ခွင့်နည်းနည်းယူပြီး ငလိုက်ကန်သာဟုနာမည်ခံထားသော ဆည်ဘေးက ဟိုတယ်တစ်လုံးဆီ သူရောက်သွားသည်။ အဲဒီမှာ သူ့ဝတ္ထုကို စိတ်ကြိုက်ပြင်ပြီး အဆုံးသတ်လိုက်နိုင်သည်။

“၁၄း၁၆

၂၀၁၇ မတ် ၁၁

ငလိုက်ရီဆော့” ဟု ၀တ္ထုအောက်ခြေမှာ ရေးထားလိုက်သည်။ ပြီးပြီပေါ့။

နောက်တော့ ဧပြီလထဲမှာ မြန်မာနှစ်သစ်ကူး ရုံးပိတ်ရက်ရှည်ရောက်လာသည်။ သူလည်း အပူနှင့် ရေရှောင်ရအောင် ရှမ်းပြည်ဘက် တက်ခဲ့သည်။ ကလောမှာ သူငယ်ချင်းတစ်ယောက်ရဲ့ သစ်လုံးအိမ်မှာ နေခွင့်ရသည်။ မြို့နှင်သိပ်မဝေးသော်လည်း သဘာဝထင်းရူးတောအတွင်း လူသူရှင်းပြီး တိတ်ဆိတ်ငြိမ်းချမ်းလှသည့်နေရာ ဖြစ်နေသည်။ တစ်နေ့တစ်နေ့ သူမမြင်ဘူးသော ငှက်ရောင်စုံတွေ သူ့အနီးအနားမှ ဖြတ်ပျံသွားသည်ကို ငေးမောနေရသည်။ တညတော့ တစ်ဘက်တောင်ကြောတွင် တောမီးလောင်သည်နှင့်အိပ်မပျော်နိုင်။ အဲဒီမှာ သူ့ဇနီးနှင့် စကားထိုင်ပြောနေကြရင်း ၀တ္ထုနောက်တစ်ပုဒ်ရေးဖို့ စိတ်ကူးစရလာသည်။ သင်္ကြန်ရက်တွေမှာ ဘယ်မှာမသွားဘဲ ၀တ္ထုကို အကြမ်းရေးလိုက်သည်။

သင်္ကြန်ပြီးနောက်ရက်များမှာတော့ နေပြည်တော်တွင် အလုပ်ကိစ္စဖြင့် ရက်ရှည်နေနေစဉ် သူ့သူငယ်ချင်း တစ်ယောက် အဲဒီကို ရောက်လာသည်။ အဲဒီသူငယ်ချင်းက သူ့ဝတ္ထုတစ်ပုဒ်ကို သေချာဖတ်ပြီး ဝေဖန်ဖူးသူ။ သူလည်း သူ့ဝတ္ထု (ဒီဝတ္ထုအရဆိုလျှင် ပထမ ၀တ္ထု) ကို ပရင့်ထုတ်ပြီး သူ့သူငယ်ချင်းကို ပေးလိုက်သည်။ သူတို့နှစ်ယောက် ထွေရာလေးပါ နှစ်နာရီ သုံးနာရီလောက် ပြောပြီးနောက် သူ့သူငယ်ချင်းကို အိမ်ပြန်လိုက်ပို့သည်။ အပြန်လမ်းမှာ သူ့ဝတ္ထု (ဒီဝတ္ထုအရဆိုလျှင် ဒုတိယ ၀တ္ထု) အကြောင်းကို ပြောဖြစ်သည်။

“ပင်စင်စား အဘိုးကြီး အဘွားကြီး လင်မယား..သူ့တို့ဟာသူတို့ နယ်မှာ သူ့တို့ခြံလေးနဲ့ သူအေးအေးချမ်းချမ်းနေနေတာ။ နောက်တော့ ရန်ကုန်မှာ စီးပွားရေး နည်းနည်းအဆင်ပြေနေတဲ့ သမီးကို အဖော်ရအောင်ဆိုပြီး အဘွားကြီးက ရန်ကုန်ပြောင်းသွားတယ်။ အဘိုးကြီးက သူ့ခြံထဲမယ် သစ္စာပန်းတွေ စိုက်ပြီး နေကျန်ခဲ့တယ်။ တစ်နှစ်နှစ်နှစ်နေတော့ အဘိုးကြီး ရေချိုးခန်းထဲ ချော်လဲပြီး လက်ကျိုးသွားတယ်။ သားအမိနှစ်ယောက် ကျန်းမာရေးစစ်ဖို့ အကြောင်းပြပြီး အဘိုးကြီးကို ရန်ကုန်ခေါ်သွားတယ်။ နောက်တော့ ဟိုလှည့်ဒီလှည့်နဲ့ ပြန်မလွှတ်တော့ဘူး။ အဘိုးကြီးက ရန်ကုန်က တိုက်ခန်းထဲက ဘ၀မှာ ဘယ်လိုမှ မပျော်ဘူး။ သမီးနဲ့ မိန်းမကလည်း နယ်ကို လုံးဝ ပြန်မလွှတ်တော့ဘူး။  နှစ်သိပ်မကြာဘူး။ အဘိုးကြီး ကျန်းမာရေး ချို့ယွင်းလာပြီး အိပ်ယာထဲ လဲတယ်။ အိပ်ယာထဲမှာ သုံးနှစ်လောက်နေပြီးမှ အဘိုးကြီးဆုံးတယ်။ အဘိုးကြီးလည်းဆုံးရော သားအမိနှစ်ယောက်က နယ်ကခြံမှာ ပြန်နေမယ်ဆိုပြီး ဆုံးဖြတ်လိုက်ကြတယ်။ အဲဒီမှာ ခြံထဲက သူတို့အိမ်ကို အလည်ရောက်လာတဲ့လူကို သူတို့ပြောပြတဲ့အကြောင်းပြချက်က အဘိုးကြီးလည်း မရှိတော့ဘူးဆိုတော့ ရန်ကုန်မယ် ဆက်နေစရာအကြောင်းလည်း မရှိတော့ဘူးလေတဲ့”

အဲဒါကတော့ သူ့သူငယ်ချင်းကို သူပြောပြခဲ့တဲ့ သူ့ဝတ္ထုရဲ့အကြောင်းပဲ။

နောက်တော့ မေလတစ်လလုံးနီးပါ သူ့ရုံးအလုပ်တွေနဲ့ သူရှုပ်နေခဲ့တယ်။

ဇွန်လရဲ့ မိုးရေစက်တွေနဲ့အတူ သူနေထိုင်ရာ ရန်ကုန်မြို့ကို သူပြန်လာခဲ့တယ်။ အဲဒီမှာ သူ့သူငယ်ချင်းဆီက သူ့ဝတ္ထုနဲ့ ပတ်သက်ပြီး ဘာမှ ပြန်မကြားရေးသေးဘူးဆိုတာ သတိရလာတယ်။ သူ့ကွန်ပျူတာကို သူပြန်ဖွင့်တယ်။ ပထမဆုံး သူ့ဝတ္ထု (ပထမ ၀တ္ထု)ထဲက အဓိက ဇာတ်ကောင်ရဲ့ ဘ၀အဖြစ်သနစ် အပိုင်းအစတွေကို သူဖျက်ထုတ်ပစ်လိုက်တယ်။

အောက်ကဟာတွေကတော့ သူဖြတ်ထုတ်ပစ်လိုက်တဲ့ အပိုင်းအစတွေပဲ။

“ ရှင်က သိပ်အဆီကွပ်ချင်တာပဲနော်။ ပြောရင်းဆိုရင်း ဂျာတောင်က ကိုကြည်ဝေး၏လက်ကို သူမ၏ ပေါင်ပေါ်မှ အသာအယာ ဖယ်ရှားလိုက်သည်။ သူတို့နှစ်ယောက်သည် စမ်းချောင်းလေး တစ်ခု၏ နံဘေးတွင် ထိုင်နေကြခြင်းဖြစ်သည်။ ဟိုးအဝေးကြီးမှာ လှမ်းမြင်နေရသည့် နှင်းတွေဖုံးနေသည့် တောင်ဆီမှ စီးဆင်းလာသည့် စမ်းချောင်းကလေးထဲတွင် တောင်ကျရေစီးကြောင့် လုံးဝန်းနေသော ကျောက်တုံးလေးများရှိနေသည်။ ကိုကြည်ဝေးက အနေရခက်ဟန်ဖြင့် ကျောက်တုံးလေးများကို ကောက်ပြီး ရေထဲသို့ လှမ်းပစ်နေသည်။ ဂျာတောင်က ဘာမှမဖြစ်ဟန်ဖြင့် စကားဆက်သည်။ တကယ်တော့ ဒီတောင်ကို ဂျပန်တစ်ယောက်က ပထမဆုံး တက်တယ်ဆိုပြီး မှတ်တမ်းတင်ထားကြတာ ရယ်စရာပဲ။ ဒီအနီးအနားရွာတွေကနေ ဒီတောင်ကို တက်ဖူးတဲ့လူတွေ အများကြီးပဲလေ။ အမြင့်ဆုံး ထိပ်ထိရောက်ဖူးတဲ့သူတွေလည်း ရှိတာပဲ။ ဒါပေမယ့် သူတို့မှာ မှတ်တမ်းမှ မရှိတာ။ ကိုကြည်ဝေးက ဂျာတောင်ကို လှည့်မကြည့်ပဲ နောက်ထပ် ကျောက်တုံးတစ်တုံးကို ခပ်လှမ်းလှမ်းရောက်အောင် အားစိုက် ပစ်ပေါက်လိုက်သည် ..”

“ရေပေါ်တွင် ပေါ်ရုံသည်ဆိုမျှသာ ပေါ်နေသော ဗိုလ်ချုပ်၏ လက်တွေက အသားကုန် ဝှေ့ယမ်းနေသည်။ တကယ်တော့ ဗိုလ်ချုပ်ကို ကိုကြည်ဝေး သေချာမသိ။ တစ်နိုင်ငံလုံး ဖြစ်ပွားသော လူထုံအုံကြွမှုအတွင်း ကျောင်းသား ခေါင်းဆောင်တစ်ဦးဖြစ်ခဲ့ပြီး တောထဲတွင် ဖွဲ့စည်း လိုက်သည့် ကျောင်းသားတပ်မတော်တွင် အရေးပါသော စစ်ဘက်ရာထူးတစ်ခုကို ယူထားသူအဖြစ်သာ သူသိသည်။ ကျောင်းသားရဲဘော်များက သူ့ကို ဗိုလ်ချုပ်ဟုပဲ ခေါ်ကြသည်။ ဗိုလ်ချုပ်သည် ညဘက် ကင်းများကို လိုက်စစ်ရင်း ငိုက်မြည်းနေသည့် ကျောင်းသားရဲဘော် တစ်ယောက်တွေ့ပါက သူ့တဲသူပြန်အိပ်ခိုင်းပြီး သူကိုယ်တိုင် ကင်းဆက်စောင့် လေ့ရှိကြောင်း သူများတွေ ပြောတာ ကြားဖူးသည်။ ကိုကြည်ဝေးတို့ ဂစ်တာတီးနေသည့်ဆီကို ပေါက်ချလာပြီး ဘယ်လိုမှ ကီးမ၀င်သည့်အသံဖြင့် သီချင်းအတင်းလိုက်ဆိုသည်ကိုမူ ကိုယ်တိုင်ကြုံဖူးသည်။ ဗိုလ်ချုပ်နှင့် ပတ်သက်ပြီး သူ နောက်ဆုံး သိလိုက်ရသည်က ရေမကူးတတ်ခြင်းပင်။ သူတို့ကူးဖြတ်နေသည့် နယ်ခြားမြစ်က ရေစီးကြမ်းလှသည်။ သူတို့ လှေကို ခက်ခက်ခဲခဲ ပြန်လှည့်လိုက်နိုင်သည့် အချိန်တွင် ဗိုလ်ချုပ် မရှိတော့..”

“၀ုန်းခနဲ ပေါက်ကွဲသံနှင့်အတူ မီးခိုးလိုလို အရာများ လွင့်ပျံလာသည်။ စစ်သားတစ်ယောက်က ကိုရင်လေးလက်ထဲမှ အလံကို အတင်း ဆွဲယူပြီး သူ့ကို ကန်ကြောက်လိုက်သည်။ ကိုကြည်ဝေးက ခဲလုံးတစ်လုံးကို ကောက်ပြီး လှမ်းပေါက်သည်။ ခဲလုံးက ကြီးနေသဖြင့် စစ်သားဆီကို မရောက်ဘဲ သူ့ရှေ့ မလှမ်းမကမ်းက လူကို သွားထိသည်။ ထိုလူ လဲကျသွားသည်။ မီးခိုးဖြူဖြူများက ပိုပြီး ထူထပ်လာသည်။ လဲကျသွားသူသည် လက်တစ်ဘက်ဖြင့် ခေါင်းကို ဖိထားပြီး ကျန်လက်တစ်ဖက်က အကူအညီ တောင်းသည့်ဟန်ဖြင့် ဝှေ့ယမ်းနေသည်။ လူအုပ်က တဖြည်းဖြည်း ကိုကြည်ဝေးဘက်သို့ ပိကျလာသည်။ တခဏအတွင်း ကိုကြည်ဝေးကိုယ်တိုင် မျက်လုံးများ စပ်လာပြီး အသက်ရှုကြပ်လာသည်..”

“ဆေးရုံအ၀င်ဝတွင် လူတွေစီခနဲ ဖြစ်သွား ကြသည်။ ထိုးဆိုက်လာသည့်ကားပေါ်မှာ အနီရောင် အလုံးကြီးတစ်လုံး လိမ့်ဆင်းလားသည်။ ကိုကြည်ဝေး သေချာထပ်ကြည့်လိုက်တော့ အဲဒါ ခန္ဓာကိုယ် အောက်ပိုင်း တ၀က်လုံး သွေးတွေရွှဲနစ်နေသော အမျိုးသမီးတစ်ဦးကို ဘုန်းတော်ကြီးပုံစံ ၀တ်ဆင်ထားသူတစ်ဦးက ပွေ့ချီလာတာ ဖြစ်နေသည်။ ထိုသူက ပါးစပ်မှလည်း ရှေ့ကလူတွေကို လမ်းဖယ်ပေးဖို့ အော်ဟစ်နေသည်။ စက္ကန့်ပိုင်းအတွင်း သူတို့တွေ ကိုကြည်ဝေး အနား ရောက်လာကြသည်။ လူနာဟုထင်ရသူ အမျိုးသမီး၏ ခေါင်းသည် ပွေ့ထားသောလက်၏နောက်ဘက်သို့ လန်ကျနေဖြင့် သူမ၏မျက်နာကို ဇောက်ထိုး အနေအထားဖြင့် တွေ့လိုက်ရသည်။ သူတို့ဖြတ်သန်း သွားသည့် ဆေးရုံ ကော်ရစ်ဒါတလျှောက်တွင် သွေးစီးကြောင်းတစ်ခု ပြတ်တောင်းပြတ်တောင်း စီးဆင်း ကျန်ရစ်ခဲ့သည်။ တစ်ယောက်ယောက်က ကိုကြည်ဝေး အနားကပ်ပြီး ပြောလိုက်သည်။ မင်းအဖေ ဆုံးပြီ..”

နောက်ထပ် ပြင်စရာတစ်ခုလည်း ထပ်တွေ့လာတယ်။ အဲဒါကတော့ သူနဲ့ ခင်တဲ့ အယ်ဒီတာရဲ့ နာမည်ကို အဓိက ဇာတ်ကောင်ရဲ့ နာမည်အဖြစ်သုံးထားတာပဲ။ သူက ခင်လို့သုံးထားတာပေမယ့် အဲဒီအချိန် (မေလကုန် ဇွန်လဆန်းလောက်)မှာ အဲဒီအယ်ဒီတာကို ခင်တဲ့လူတွေရဲ့ စာတွေပဲ ထည့်တယ်လို့ ဝေဖန်နေကြတဲ့ အချိန်ဖြစ်နေတယ်။ နာမည်လဲတာကတော့ copy and replace နဲ့ လဲလိုက်ရုံပဲ။ မခက်ဘူး။ ဒါပေမယ့် လဲရမလား မလဲရဘူးလား သူဝေခွဲမရဖြစ်နေတယ်။

နောက်ပြီး ၀တ္ထုထဲမှာ သူပြောချင်တာကော ပေါ်လွင်ရဲ့လားဆိုတာလည်း သူသိပ်မသေချာဘူး ဖြစ်နေတယ်။

 

မိုးဆတ်

 

 

 

 

Read Full Post »

 

ပထမဆုံးလ၏ နောက်ဆုံးရက်များအတွင်း အလင်းရောင်ကောင်းစွာရရှိသော ဟိုတယ်ခန်းတစ်ခုအတွင်းသို့ သူရောက်ရှိနေခဲ့သည်။ ခပ်လှမ်းလှမ်းတွင် တောမီးများလောင်နေသော်လည်း သူ နှစ်ခြိုက်စွာ အိပ်မောကျသွားခဲ့သည်။ သူတရေးနိုးလာတော့ သူ့အခန်းတွင်းသို့ ၀က်ဝံများ ရောက်ရှိနေကြသည်။ ၀က်ဝံတကောင်က သူ၏ မလျှော်ဖွပ်ရသေးသော အတွင်းခံများကို မီးပူတိုက်နေသည်။ နောက်ဝက်ဝံတစ်ကောင်က ကျွန်မဘာလုပ်ပေးရမလဲရှင်ဟု မေးလိုက်သည်။ သူအား အိပ်ထိလိင်များက အဲဒီမေးခွန်းမေးတိုင်း သူ့ခေါင်းထဲပေါ်လာသည့် အဖြေက တစ်မျိုးထဲပင်။ ၀က်ဝံ၏ မျက်နှာကို ကြည့်၍ သူ၏ အဖြေကို ပြောင်းလဲခဲ့သည်။ သူပိုင်ပိုင်နိုင်နိုင် သိထားသည်မှာ သူ၏ အမိုက်မဲဆုံးနှစ်များသို့ သူပြန်မသွားလိုကြောင်းပင်။ သူ၏ ပထမအမိုက်မဲဆုံးနှစ်တွင် ဖခင်ဖြစ်သူက သူ၏ အိမ်သာကျင်းကို ဆယ်ပေးနေစဉ် သမီးဖြစ်သူနှင့် သူအိပ်စက်ခဲ့သည်။ နောက်တစ်နေ့ နံနက် အိပ်ယာက နိုးလာတော့ ခြေဆေးရန် ထားသည့် စဥ့်အိုးထဲတွင် လောက်တွေ ဖြူဖွေးပြည့်နှက်လို့။ ဒုတိယ အမိုက်မဲဆုံးနှစ်တွင် နေ့နံကိုအခြေခံ၍ ဘယ်ဘောလုံးအသင်းနိုင်မည်ဟု ခန့်မှန်းထားသည့် ဟောကိန်းများကို ဖတ်ရှုနေခဲ့သည်။ တတိယ တစ်နှစ်တွင် သူ,မလိုလားသည့် ဧည့်သည်တစ်ယောက် အိပ်နေသည့် ခြင်ထောင်ကို မူးချင်ယောင်ဆောင်၍ သေးနှင့်ပန်းပစ်ခဲ့သည်။ နောက်တစ်နေ့တွင် သွားနှုတ်ရန်လိုသည်ဟု ထင်လာသဖြင့် သွားဘက်ဆိုင်ရာ ဆေးတက္ကသိုလ်သို့ သူသွားသည်။ သူတို့က သူ့သွားကို နှုတ်မပေးကြ။ စိတ်ပျက်လက်ပျက်နှင့် သူပြန်ထွက်မည့်ပြုစဉ် တက္ကသိုလ် ကော်ရစ်ဒါ ရှိ အကြွေစေ့ထည့်ပြောရသော တယ်လီဖုန်းက မြည်လာသည်။ သူကိုင်လိုက်တော့ သူဖောက်ထွင်းဝင်ရောက်၍ မရခဲ့သော ဂျင်းဘောင်းဘီ တထည်စီက ဖြစ်နေသည်။ ဂျင်းဘောင်းဘီက ဖုန်းထဲမှာ ငိုနေသည်။ သူ့ကို အရင်က ရှာခိုင်းထားတာတွေ မရှာခိုင်းတော့ဟု ဂျင်းဘောင်းဘီက တတွတ်တွတ်ပြောနေသည်။ သူဖုန်းချလိုက်သည်။ ၀က်ဝံက ကျန်ဝက်ဝံ၏ ပါးစပ်ကို ဖြဲ၍ အတွင်းဘက်ကို မီးပူဖြင့်တိုက်နေသည်။ သူကတော့ သူ့အဖြေကို ပြောင်းလဲရန် စိတ်ကူးမရှိ။ လေထဲမှ တွဲလောင်းကျနေသော တယ်လီဖုန်းလက်ကိုင်ခွက်၏ အချို့နေရာများတွင် ဆေးများ ပျက်ပြယ်စပြုနေပြီ။ တစ်ယောက်ယောက် သူ့ပခုံးကို ပုတ်လိုက်သည်။ လှည့်ကြည့်လိုက်တော့ သူလက်ထဲသို့ စာရွက်တစ်ရွက်ထိုးပေးသည်။ စာရွက်ပေါ်တွင် သူ၏သွားများသည် နှုတ်ရန် သင့်လျော်ကြောင်း ထောက်ခံပါသည်ဟု သွားဘက်ဆိုင်ရာ ဆေးတက္ကသိုလ်၏ ပါမောက္ခချုပ်ဖြစ်သူက လက်မှတ်ရေးထိုးထားသည်။ သွားတွေ အကုန်နှုတ်ပစ်လိုက်ပြီးနောက် လောက်တွေဖွေးနေသည့် ခြေဆေးရေတွေကို အားရပါးရ ခပ်သောက်လိုက်သည်။ အဲဒီအကြောင်း ယခု ပြန်တွေးမိရင်ပင် သူ့နှုတ်ခမ်းတွေ စိုစွတ်လာစမြဲ။ သမီးဖြစ်သူက ပြီးပြီလား အစ်ကိုဟု မေးလိုက်စဉ်မှာပင် ဖခင်ဖြစ်သူက ပြီးပြီအစ်ကိုဟု ပြောလိုက်သည်။ မြက်တွေကိုပဲလောင်ပြီး သစ်ပင်တွေကို မလောင်သည့် မီးမျိုးလည်း ရှိတယ်လို့ သိလိုက်ရချိန် သူ့မှာ တအံ့တသြ။ လေထဲ တဆတ်ဆတ် တုန်နေသည့် တယ်လီဖုန်းခွက်မှာ တခုခု ပြောချင်နေပုံ..။

 

-မဆ

Read Full Post »

သူ့ကိုယ်သူ ပြန်သတိဝင်လာတဲ့အခါ မှန်တစ်ချပ်ရှေ့မှာရောက်နေပြီ။ ပြန်စဉ်းစားတော့ နောက်ဆုံးအဖြစ်အပျက်ဟာ လွန်ခဲ့တဲ့ နှစ်၂၀လောက်က.. သူမသေခင် ဆေးရုံခုတင်တစ်ခုပေါ်ရောက်နေတာပဲဖြစ်တယ်။ တခြားသူတွေကတော့ မမှတ်မိဘူး။ သူ့ကိုယ်သူတော့ သူဟာသေနေပြီလို့ တစ်ထစ်ချယုံကြည်ထားတာပဲ။ ဒါပေမယ့် သူမသေဘူး။ နောက်တော့ ဘောင်းဘီအိတ်ထဲက လက်ကိုင်ဖုန်းတုန်ခါသံကို ခံစားမိတယ်။ ဖွင့်ကြည့်လိုက်တော့ ဒီကနေ့ ၆နာရီခွဲ ရုပ်ရှင်ပွဲအတွက်နောက်မကျဖို့ လူတစ်ယောက်ဆီက ပို့လိုက်တဲ့ စာ။ အဲဒါနဲ့ လိပ်စာရောလို့ သူပြန်ရိုက်ထည့်လိုက်တယ်။ သူ့ကိုယ်သူ သိပ်သိချင်နေတယ်။ သူဘယ်ကလာတယ် သူ့နာမည် ဘယ်သူ။ သူ့ကိုသိတဲ့ သူတွေက တဆင့် သူ့ကိုယ်သူ ပြန်သိခွင့်ရမှာပဲလို့ ထင်နေတယ်။ သူ့ကို မသိသေးတဲ့သူတစ်ယောက်လည်း ဖြစ်ချင်ဖြစ်မှာပေါ့လေ။ အိမ်ထဲကိုကြည့်တော့လည်း သူတစ်ယောက်ထဲပဲရှိတယ်။ နာရီကိုကြည့်တော့ ၅နာရီပဲ ရှိသေး။ ဒါပေမယ့် သူ့ဝတ်စားပြီနေပြီ။ ဘာအတွက်လဲဆိုတာတော့ စာဖတ်သူရဲ့ ခန့်မှန်းချက်ဟာ သူ့ခန့်မှန်းချက်ထက်တောင် ကောင်းရင်ကောင်းနေနိုင်ပါသေးတယ်။ နောက်ထပ် ပွဲလမ်းသတင်တစ်ခုများရှိနေသလား။ သူ့ဝတ်ပုံစားပုံကိုကြည့်ပြီး သူ့ကိုယ်သူ ပြန်မှန်းကြည့်တယ်။ နိုင်ငံတော်အခမ်းအနားတစ်ခုခုတော့ မဟုတ်လောက်ဘူးထင်ပါတယ်။ ရှိသမျှအိတ်ကပ်တွေလိုက်စမ်းကြည့်တော့ အပေါ်အင်္ကျီထဲကနေ လက်မှတ် ဖြတ်ပိုင်လေးတစ်ခုထွက်လာတယ်။ ဖတ်ကြည့်လိုက်တော့ ကမ္ဘာပေါ်မှာ ရှိတယ်လို့ သူသိမထားတဲ့ နိုင်ငံတစ်ခုဆီ အသွားအပြန်လေယာဉ်လက်မှတ်နှစ်စောင်။ အဲဒါကို စဉ်းစားနေရင်းက ပြန်သတိထားမိချိန်မှာ သူထွက်လာတဲ့ အိမ်အရှေ့က ရပ်ထားတဲ့ ကားတစ်စီးပေါ်ရောက်နေပြီ။ သော့ကလည်း တပ်လျက်သားပဲ။ အဲဒါနဲ့ပဲ စက်နှိုးပြီး မောင်းထွက်သွားလိုက်တယ်။ လမ်းတစ်လျှောက်မှာ သူမသိတဲ့ လူတွေ၊ သူ အကျွမ်းမဝင်တဲ့ ရှုခင်း၊ တချို့က သူ့ကို လက်တွေ ရမ်းပြတယ်။ သူလည်း အားနာနာနဲ့ ခေါင်းပြန်ညိတ်ပြတယ်။ အဲဒီနေတဆင့် သူကိုယ့်သူ အားနာတတ်တဲ့ စရိုက်ရှိကြောင်း သတိထားမိသွားတယ်။ မီးပွိုင့်မှာ ကားကိုရပ်ထားတုန်း ပန်းစည်းကိုင်းထားတဲ့လူတစ်ယောက်  နောက်ကနေပြီး သူ့ဆီချဉ်းကပ်လာတယ်။ ပန်းတွေကိုကြည့်နေရာကနေ ရုတ်တရက် ပန်းတွေကြားက သေနတ်တစ်လက်ကို သူ လှမ်းမြင်မိတယ်။ မြင်မြင်ချင်းပဲ သူကားကို မောင်းထွက်ဖို့ဂီယာထိုးလိုက်တယ်။ ဒါပေမယ့် ဒုတိယအတွေး… ဒုတိယအတွေးတစ်ခုက သူ့ခေါင်းထဲဝင်လာချိန်မှာတော့ သူ့ကားကို သူ စက်သတ်လိုက်တယ်။ ပန်းစည်းကိုင်ထားသူလည်း ကြိုတင်ကြံစည်ထားတဲ့အတိုင်း အနားကို ကပ်လာတယ်။ သူကတော့ မျက်လုံးကို မှိတ်ထားလိုက်ပြီး စီယာတိုင်ကိုခပ်ဖွဖွလေး ကိုင်ထားမိတယ်။ အနားရောက်တော့ သေနတ်ကို ထုတ်ပြီး သူ့ခေါင်းကို ချိန်ပစ်လိုက်တယ်။ ဒိုင်းခနဲ သေနတ်သံကြောင့် လူတွေ ခဏတော့ လန့်သွားတယ်။ ပြီးတော့ ကိုယ့်လမ်းကိုယ် ဆက်သွားကြတာပါပဲ။ အဲဒီအချိန်ကစပြီး ကိုယ့်ကိုယ်ကိုမသိတော့ခြင်းရောဂါဟာ အဲဒီမြို့လေးတစ်မြို့လုံးကို ကူးစက်သွားလေရဲ့။

K.N.

၂၀၁၇ မတ် ၅

Read Full Post »

24/7

ဖေ့စ်ဘွတ်မယ် ဖရင်းတစ်ယောက်က နတ်သမီးတံဆိပ် ယမ်းမီးခြစ်ဘူးလေး တင်ထားတာတွေ့တော့ စတိုးဆိုင်မယ် ကိုယ်ဝယ်နေကျ ပစ္စည်းလေးတွေ မတင်တော့တဲ့အခါ ကြုံရတဲ့ ခံစားမှုအကြောင်း The Map and Territory ထဲမယ် ၀ဲလဘက်ရေးဖူးတာကို သွားသတိရတယ်

စတိုးဆိုင်ဆိုရာမှာလည်း သူတို့ဆီက ဝေါလ်မတ်လို ဆိုင်ခွဲပေါင်း ရာထောင်ချီ ဖွင့်ထားတဲ့ဟာကြီးတွေပေါ့လေ အဲဒီမှာ သိပ်အရောင်းမသွက် (သူတို့ကျေနပ်လောက်အောင် အရောင်းမသွက်)တဲ့ ပစ္စည်းတစ်ခုဟာ စင်ပေါ်ကနေ မကြာခင် အရှင်းခံရမယ် ဈေးကွက်ကနေ ပျောက်သွားမယ် အဲဒီတံဆိပ်လေးမှ အဲဒီပုံစံလေးမှဆိုပြီး အဲဒီပစ္စည်းမှ ပစ္စည်းစွဲစွဲလမ်းလမ်း သုံးတတ်တဲ့သူကတော့ ဆွေးပေတော့ပဲတဲ့

သောက်ကြီးသောက်ကျယ် ပြောကြေးဆိုရင်တော့ ကက်ပီတယ်လစ်ဇင်က အင်ဒီဗီဂျူရယ်အဖြစ်ကို သေးသိမ်သထက် သေးသိမ်အောင် ချုံ့ပစ်နေတာတို့ဘာတို့ ပြောရလိမ့်မယ် တစ်ဦးချင်းရွေးချယ်မှုတွေက ကျဉ်းမြောင်းသထက် ကျဉ်းမြောင်းလာတာတော့ အမှန်ပဲ

အခုဆိုရင် ရန်ကုန်မှာ မြေညီထပ်ဝယ် အိမ်ဆိုင်ဖွင့်ပြီး တသက်လုံးထိုင်စားလို့ရတယ်ဆိုရိုးရှိတဲ့ တောသဌေးအိပ်မက်ဟာ တွင်တီဖောဆဲဗင်းစတိုးလေးတွေရဲ့ ခြိမ်းခြောက်မှုကို ခံနေရပြီ မဟုတ်လား  စူပါမားကက်ဆိုင်အကြီးအသေးတွေရဲ့ တွင်ကျယ်လာမှုနဲ့အတူ သူတို့ရဲ့ ဆပ်ပလိုင်ယာစာရင်းမှာ မ၀င်တဲ့ ကုန်စည်အမည်တွေဟာ တဖြည်းဖြည်း ထုတ်လုပ်မှု ရပ်တန့်သွားရတာမျိုး ဒီမှာလည်းလည်း ဖြစ်လာနိုင်ပြီလေ

အဲလိုဆိုင်တွေရဲ့ ကျယ်ပြန့်လာမှုနဲ့အတူ နောက်ဆိုရင် ကျွန်တော်တို့ဟာ တချို့ ကုန်စည်အမျိုးအမည်တွေအတွက် ကုန်အမှတ်တံဆိပ်တမျိုးပဲ ရွေးလို့ရတာမျိုးတောင် ဖြစ်လာနိုင်တယ် ခုတောင် ပေါင်မုန့်ဆိုရင် ပူစီ အချဉ်ထုပ်ဆိုရင် ဆွေမျိုးမေ့ ဒိန်ချဉ်ဆိုရင် ဒတ်ခ်ျမေးဆိုတာမျိုး ဖြစ်စပြုနေပီလေ

ကြာလာရင် အဲဒီ တွင်တီဖိုးဆဲဗင်းစတိုးဆိုင်အတွဲတွေမှာ မတင်တဲ့ တခြားကုန်အမှတ်တံဆိပ် တွေဟာ နတ်သမီးတံဆိပ် မီးခြစ်ဘူးလိုပဲ ကျွန်တော်တို့ ဘ၀ထဲက ထွက်သွားကြရလိမ့်မယ် ကျွန်တော်တို့ကလည်း သူတို့ကို ဂျွန်ပလေးယားစပယ်ရှယ်ကို မေ့သလိုမျိုး မေ့သွားကြလိမ့်မယ်ထင်တယ်

-မဆ

Read Full Post »

Older Posts »